قواطع السفر وأحكام الوطن

أعوذ بالله السميع العليم من الشيطان الغوي الرجيم، بسم الله الرحمن الرحيم، (وصلى الله على محمد وعلى أهل بيته الطيبين الطاهرين)، (اللهم صل على محمد وآل محمد).

تعريف قواطع السفر

(قواطع السفر): قلنا سابقاً أن هذه قواطع السفر أمور لو حدثت أثناء السفر فإنها تؤدي إلى قطع حكم السفر، فيكون المسافر حينئذ عليه أن يتم الصلاة إذا وقع واحد من هذه القواطع.

قال المصنف: (إذا تحقق السفر واجداً للشرائط الثمانية المتقدمة بقي المسافر على تقصيره في الصلاة ما لم) إلا إذا (ما لم يتحقق أحد الأمور) التي تسمى بالقواطع، (قواطع السفر الآتية).

القاطع الأول: المرور بالوطن

وهي أولاً: (الأول من قواطع السفر: المرور بالوطن)، فلو مر المسافر بوطنه فلا ريب أن الإنسان في وطنه لا يسمى مسافراً، ونحن الحكم مترتب على السفر، فحينئذ ما حكمه هذا؟ حكمه عليه أن يتم الصلاة.

لهذا قال: (فإن المسافر إذا مر به) أي مر بوطنه (في سفره وجب على المسافر الإتمام إلا إذا أنشأ سفراً جديداً)، وحتى حين ينشئ سفراً جديداً لا بد أن يعبر حد الترخص.

أقسام الوطن

قال: (ونعني بالوطن أحد المواضع الثلاثة الآتية)، وهي أولاً: أقسام الوطن؛ الوطن ينقسم بالتقسيم الفقهي إلى ثلاثة أقسام، أما في التقسيم العرفي فلا توجد أقسام كثيرة، العرف يفهم الوطن قسماً واحداً، لكن الفقهاء يقسمون الوطن إلى أقسام ثلاثة:

• أولاً: الوطن الأصلي.
• ثانياً: الوطن الاتخاذي.
• ثالثاً: الوطن الشرعي.

1. الوطن الأصلي

الوطن الأصلي: هو مسقط رأس الإنسان ومولده ومقره الأصلي ومكان سكنى والديه وأجداده، هذا يسمى الوطن الأصلي، وهذا هو الوطن المتعارف. كل إنسان يولد في منطقة معينة وينسب إليها، فيقال هذا من البصرة وذاك من الموصل وهذا من بغداد، فهذا وطنه أي محل مكانه، وهذا يسمونه الوطن الأصلي، وهو ليس اختيارياً.

الوطن الأصلي ليس اختيارياً، الوطن الأصلي مثل الوالدين والعائلة، ليس أمراً اختيارياً، تجد نفسك مولوداً في هذه المنطقة ومحسوباً على هذه المنطقة. هذا هو القسم الأول (الوطن الأصلي).

الوطن الأصلي لا يشترط فيه أن يكون لك فيه سكن بنحو التمليك؛ لهذا ربما واحد طوال عمره يسكن بالإيجار، وُلد في منطقة وما عنده بها ملك، ملك ما عنده بس هو من البصرة مثلاً، يقول لك هي سكناي وولادتي بها بس أنا ترى ما عندي بها ملك، فماذا نقول له؟ نقول له البصرة موطن لك، تقول أنا تركت البصرة وجئت للنجف أسكن؟ سؤالي عن البصرة التي تركتها، هل تركتها بمعنى بطلت منها بعد ما تريدها؟ أعرضت عنها؟ أعرضت عن سكناها في المستقبل؟

إذا قال: لا، ما أعرضت عنها، البصرة هي مولدي بها، بس أني الآن سكناي الفعلي وين صار؟ في النجف، لكن البصرة أرجع لها إن شاء الله ولو في المستقبل، مثلاً أخلص دراسة أرجع، أتقاعد أرجع.. وهكذا حسب النية مالته. فإذا عنده نية أن يرجع للوطن، يرجع للبصرة، لا تزال البصرة بالنسبة له وطناً، فكل ما يروح للبصرة لازم يصلي تمام.

أما إذا نوى أنه ينقطع عن البصرة، يقول: هذه المنطقة الفلانية بعد ما أريدها، أكرهها، أنا صحيح ولدت بها بس بعد ما أريدها، الله كفاني شرها وبعد ما أريدها، سكنت بالنجف الحمد لله مشاهد مقدسة وكذا، وتلك المنطقة الفلانية المو زينة بعد ما أريدها أني، ما عندك نية ترجع لها؟ لا والله بعد ما أرجع لها، والله لا يرجعني لها. إذا يتكلم بهذا الأسلوب، فهذا بعد صارت وطناً له أم لا؟ لا، الوطن يزول بالإعراض.

هذه من القواعد المهمة: الوطن الأصلي وحتى الوطن الاتخاذي يزول بالإعراض. الإعراض يعني شنو؟ يعني ترك نية الرجوع في المستقبل، ما عندي نية أرجع له. مثلاً تصير عند الإنسان ظروف معينة ويقول لك بعد ما أرجع لهناك أبد ما أريدها، فإذا هيك عنده نية شو يسمون هذه المنطقة؟ صارت أجنبية عنه، صار يصلي بها قصر حتى إذا هو مولود بها، حتى إذا والديه مولودين بها.

الوطن الأصلي يوجد قهراً عليك، لكنه يزول بالإعراض. الوطن الأصلي مو اختياري، مو بكيفك تختاره بس بكيفك تتركه.

2. الوطن الاتخاذي

القسم الثاني من الوطن يسمونه: الوطن الاتخاذي. الوطن الاتخاذي من اسمه، أنت تتخذه، يعني أمر اختياري مو مجبور عليه، أنت تتخذه باختيارك. لما وعيت وصار عندك استقلالية بالتصرف قلت أنا ليش ما أروح أسكن كربلاء أجاور الإمام الحسين (سلام الله عليه) وأبقى بهذه المنطقة إلى أن أموت، بعد انتهت، صارت بعد موطني هذا كربلاء.

طبعاً كربلاء ما يسمونها وطناً أصلياً، يسمونها وطناً أصلياً له؟ لا، لأن الوطن الأصلي المكان المولود به، بس هذا شو يصير بالنسبة له؟ وطن اتخاذي. الوطن الاتخاذي يعني شلون؟ أولاً: أن يتخذ الإقامة في هذا الوطن -عند السيد الخوئي يقول- إما إلى أن يموت (ناوي)، أو إلى أمد بعيد، مثلاً 20 سنة يسكن به، هاي مهمة: كيف يتحقق الوطن الاتخاذي؟

مو أنا اليوم سكنت بكربلاء مثلاً، كربلاء صارت وطناً اتخاذياً لي؟ الجواب: لا، يحتاج تكون عندك نية أنك شقد تبقى به؟ واحد يقول شهر، صار وطناً اتخاذياً بشهر؟ كلا، ما صار وطناً اتخاذياً. شهر هو يقول لك أنا ناوي أبقى بكربلاء عندي إيفاد، هذا الإيفاد ستة أشهر ويرجع، هذا وطن اتخاذي صار كربلاء؟ لا مو وطن اتخاذي، ستة أشهر شنو؟ يعتبر قليلاً.

واحد وين رايح؟ لكربلاء، شعدك؟ عندي عمل يطول سنتين وأرجع، سنتين عمل مقاولة يبني له فد عمارة.. سنتين وأرجع، هذا وطن اتخاذي صار؟ لا لا مو وطن اتخاذي. إذاً الوطن الاتخاذي شنو؟ الوطن الاتخاذي أن تنوي أن تبقى في هذه المنطقة إما إلى الأبد، لما تموت، أو عند السيد الخوئي مدة طويلة فد 20 سنة وفوق، عشر سنوات وفوق، السيد السيستاني يقول: لا لا إلا للأبد، إلا يبقى به للأبد، حتى عشر سنوات هم مو كافي، كون يبقى به لمن؟ للأبد. هاي مهمة مولانا، ابتلائية، يجيك واحد يقول لك أنا ناوي أسكن بكربلاء، أجرت بكربلاء، قله شقد ناوي تبقى بيها؟ يقول لك مثلاً شهر وأرجع، مثلاً، صار وطناً اتخاذياً؟ لا، هذا مقر، أكيد تتم به الصلاة وتتم به المقر بس مو وطن، الوطن غير حكم.

جاي يدرس بالنجف، شقد ناوي تبقى؟ إذا يقول عشر سنوات وعشرين سنة، هذا صار وطناً اتخاذياً عند السيد الخوئي، لأن الوطن الاتخاذي قلنا شنو؟ أبقى به مدة طويلة. أما إذا واحد يقول لا للموت، كغالب هؤلاء الذين يأتون من خارج العراق، المهاجرين اللي يجون من خارج العراق مثلاً يجون يدرسون بالنجف ناوين يبقون للأبد، يقول لك ما نرجع لاهلنا، نرجع زيارة نزورهم، صار أهلنا نزورهم مو هذا مكانه، صار هنا اتزوج وهنا اموت وهنا اندفن وهنا كذا، فهذا شسموه بعد بالنسبة له؟ صار وطناً اتخاذياً.

الوطن الاتخاذي إذاً هو قهري لو اختياري؟ اختياري. وزواله؟ الجواب يزول أيضاً بالإعراض، الوطن الاتخاذي كالوطن الأصلي يزولان بالإعراض.

قال: (ثانياً: المكان الذي اتخذه مقراً لنفسه ومسكناً دائمياً) دائمياً إلي، للدوم أبقى به، (أو إلى أمد بعيد) السيد الخوئي يقول حتى إذا مو شرط دائمي، دائمي يعني للموت، هذا لا يقول لا أو أخف من عدها، أو إلى أمد بعيد (يصدق معه) مع هذا الأمد البعيد (أنه أهل ذلك المكان).

الوطن الاتخاذي لا يشترط فيه الملك، كما أن الوطن الأصلي ما يشترط فيه الملك، الوطن الاتخاذي لا يشترط فيه الملك. خاف واحد بيكم يقول مو أنا حتى يصير وطن اتخاذي لازم أشتري لي بيت؟ يصير أنا مأجر ويسمونه وطن اتخاذي؟ يصير لو ما يصير؟ يصير ماكو مشكلة، بس أنت عندك نية تبقى للدوم؟ إي عندي نية أبقى للدوم، بس أبقى للدوم مأجر ما عندي فلوس أشتري لي بيت، هم يصير وطن؟ الجواب إي ماكو مشكلة، الوطن الاتخاذي كالوطن الأصلي لا يشترط فيهما التملك. لهذا قال: (أنه أهل ذلك المكان) قال (ولا يصدق عليه أنه مسافر فيه، ولا فرق في ذلك) يعني اتخاذ المكان وطناً (بين أن يكون بالاستقلال أو يكون بتبعية غيره).

واضحة هذه، مرة أنا مستقل، يعني أنا صاحب البيت وأنا صاحب الشأن وأنا جيت سكنت كربلاء مستقل في تصرفي، ومرة لا والله، يجيك السؤال يسألك ابن أو تسألك زوجة، تقول لك أني بتبعية زوجي هي تقول، أو الابن يقول بتبعية أبي، يقول له إي، يقول بس أبي -أو هي تقول لكن زوجي- نوى أن يسكن إلى أمد حياتي والى آخر حياتي يسكن وين؟ يسكن في كربلاء، تسألك الزوجة: هل كربلاء وطن لي؟ هي وطن لزوجي، لكن هل هو وطن للزوجة أيضاً؟ شنوالجواب؟ نقول أيضاً بمقتضى تبعية الزوجة لزوجها والعبد لسيده والابن لأبيه تحصل أيضاً، يحصل وطن اتخاذي للتابع كما يحصل للمتبوع، وهاي مهمة.

زين ونية الإعراض؟ إذا لقيت هيج حالة، لو فرضنا يجيك هذا السؤال: أنه زوج وزوجته مولودين في بغداد وسكنوا النجف، اتخذوا النجف وطناً اتخاذياً لهما، نجي للزوج يقول أنا بعد بغداد ما أريدها، بغداد بعد ما أريدها بطلت منها لو مدري شيصير ما أرجع لها، لو أعرف أموت بالنجف وما أرجع لبغداد، هذا شيسمون بالنسبة لبغداد؟ أعرض عن بغداد. نجي للزوجة تقول: لا، أني أهلي موجودين ببغداد، لو فرضنا لا سمح الله، لا سمح الله لو طلقت هي تقول، أو زوجي مات، المن أرجع؟ أرجع لبغداد وين أروح أني؟ واضح السؤال؟ هاي تصير.

شلون تصير؟ تصير لمن يجوك اثنينهم ويسألوك، إحنا هسة ببغداد خابروك، إحنا هسة ببغداد شنصلي قصر لو تمام؟ تضطر تقول لهم تعالوا افحص نواياكم، الزوج شنو نيته؟ يقول لك أنا شالع ثنينهم من طالعت بغداد بعد ما أرجع لها لو مدري شيصير، لو أعرف مدري شيصير ما أرجع لبغداد، أهلي بعد صار وطنك بالنجف، بغداد أهلي بس أنا بعد ما عندي نية أرجع لأهلي يعني أسكن وياهم، أزورهم من بعيد لبعيد، أحسن، مشاكل ما تصير، من أصير يمهم قريب تصير مشاكل جايبها بدها، فلهذا قررت بعد ما أسكن بغداد مثلاً. فنقول له بالنسبة للزوج شنقول له أنت؟ نقول له أنت صلي قصر، بغداد صارت مو وطن إلك. الزوجة شتقول؟ تقول لا أني على أهلي، هي تقول عندي نية أرجع لهم، كان وين أروح؟ هي تقول أني مرة وحرمة وإذا مات زوجي أو طلقني وين ما عندي غير أرجع لأهلي، فهاي عدها نية إعراض لو ما عدها نية إعراض؟ ما عدها نية إعراض، فإذا راحوا هم لبغداد، زوجته تصلي تمام وهو شيصلي؟ قصر. انتبهوا على هاي مهمة.

قال: (ولا تعتبر إباحة المسكن في هذين القسمين) حتى لو كان واحد غاصب منزل ببغداد أو غاصب منزل بالنجف، إحنا نقول له عندك نية تبقى للدوم؟ يقول عندي نية أبقى للدوم، فنقول له بالنسبة لك صارت النجف شنو؟ وطن إلك، يقول مو أنا سارق هذا البيت أو ساكن بي بدون إذن شرعي؟ قله حرام عليك، أكيد إحنا ما قلنا لك حلال، بس إحنا نحكيلك أن النجف أنت عندك نية تبقى بيها للدوم؟ يجاوب نعم، فهاي يصير وطن اتخاذي. قال: (ولا يزول عنوان الوطن فيهما) يا هما فيهما؟ في الوطن الأصلي وفي الوطن الاتخاذي (لا يزول إلا) إلا بإعراضه عن سكنى ذلك المكان (والخروج عنه خارجاً) يطلع منه يقول بعد ما أرجع، نية بعد ما عندي نية أرجع لوطني، فأعرض عن وطنه حينئذ شنو حكمه؟ بعد كل ما يرجع لوطنه أو لهذا البلد يصير مسافر يصلي قصر، أما إذا عنده نية يرجع ولو بالمستقبل، لا تتصورون بعضكم يتوهم، يقول أنا شمدريني بالمستقبل؟ أقول له عندك نية ترجع بعد عشر سنوات بعد عشرين سنة لأهلك؟ ما أدري، مو ما تدري، تدري أنت بس شنو تقول ما تضمن الظروف، الظروف ما تضمنها، مو كو واحد ما يضمن الظروف، واحد من تقله ورى عشر سنوات شتسوي؟ عايشين عشر سنوات؟ قله أنا ما قايل لك عايش، لو فرضنا عشت عشر سنوات، عندك نية ترجع لأهلك؟ لا قله إذاً تتم، أنت ما معرض عن وطنك، أنا ما أحكي أنت بالمستقبل شراح يصير، يجوز باكر تموت يجوز بعد ساعة تموت هي ما هربت هاي، إحنا ما قاعد نقول لك أنت راح تعيش عشر سنوات تعيش عشرين سنة، لا إحنا نحكي على نية، نية، لو فرضنا الله مد بعمرك فد مية سنة ليقدام، أنت ترجع لأهلك لو لا؟ ترجع لوطنك تسكن بيه؟ هذا هو.

3. الوطن الشرعي

ثالثاً: الوطن الشرعي. الوطن الشرعي هو أن يملك الإنسان بيتاً في بلد ما ويسكن فيه لمدة ستة أشهر متوالية. إذا عندك بيت ملك، وسكنت به ستة أشهر متوالية، بعدين حتى إذا طلعت، رحت لغير منطقة، تعتبر هاي شنو؟ وطن واحد، ذولا الناس اللي الله معطيهم، اللي الله معطيهم فلوس ذولا يقدر يسوي له أكثر من وطن، عندك فلوس؟ يقول إي أشتري بيوت، أقدر أشتري بيوت. أشتري لك بيت بكربلاء؟ إي، قله اقعد بيه ستة أشهر، قعد بيه ستة أشهر، وبعدين؟ بناله كربلاء صارت وطن، وكربلاء صارت شنو بالنسبة لك؟ وطن. أشتري لك بيت بالنجف؟ بيت بالنجف، اسكن به ستة أشهر، صارت النجف شنو؟ وطن، وتجي تصوم بعد أو تتم، اشتري لك بيت ببغداد وهكذا صار عنده أكثر من وطن في أكثر من، بس بشرط شنو؟ ذكروها: لهم ملك، مو مأجر أخ، مو إيجار، وبعد؟ ملك وبعد شنو وياه؟ ويبقى ستة أشهر، إذا اجتمعن ذني الأمرين، حتى إذا ما عنده نية البقاء، حتى إذا ما عنده نية أن يبقى للدوم أو عشر سنوات أو، يقول لك بس أريد منا ستة أشهر بس، بس أهم شي الملك له، هذا الوطن الوحيد اللي يشترط به شنو؟ تملك. وبعد؟ ويزول مو بالإعراض، يزول بمن؟ بزوال الملك.

فإذا هو قال أنا كربلاء شلون أتخلص من عدها صارت وطن إلي؟ أنا أريد أصلي بيها قصر، أرد أفطر؟ شلون؟ قلنا له إذا هيج بيع بيتك هذا اللي اشتريته، يعني إذا أبيعه أخلص؟ إي تخلص، باع بيته انباغ بيته صارت كربلاء شنو؟ رجعت ليست وطناً.

لهذا قال: (ثالثاً: المكان الذي)، هذا كلام هذا رأي السيد الخوئي فقط، السيد الخوئي هو الذي يقول بأنه يمكن أن يكون للإنسان وطن غير الوطن الأصلي وغير الوطن الاتخاذي اللي سميناه؟ الوطن الشرعي، هذا رأي السيد الخوئي وبعض الأعلام، أما باقي العلماء، السيد السيستاني وكثير من العلماء كلهم يقولون ماكو وطن اسمه وطن شرعي، ماكو وطن شرعي، مو اشتريت لك بيت قعدت بيه ستة أشهر، لا، لو وطن أصلي لو اتخاذي، ما عندنا حالة وسط بالنص، أعيدها هاي، فإذا أنا اشتريت لي بيت وقعدت بيه بس ستة أشهر، بعدين ما عندي نية أبقى بيه للدوم، هذا عند السيد الخوئي وطن شنو؟ وطن يعني يعتبر وطن وله أحكام الوطن، أما عند باقي الأعلام شيعتبرونه؟ لا، بمجرد ما عندك نية تسكن بيه للدوم، مو وطن هذا.

قال: (ثالثاً: المكان الذي يملك فيه منزلاً) يملك، هاي أول وحدة، (قد أقام فيه) هذا الشرط الثاني، أقام فيه شقد؟ (ستة أشهر وهم متصلة) متصلة مو بالشهر الأول من السنة سكن بيه، نوب رجع له الشهر الخامس مال السنة، نوب رجع بالشهر السابع، نوب سواء ستة بس تلفيقية، لا ما يريد تلفيقية يريد متصلة. يقول: (وعن قصد ونية) عن قصد، إنه جاي يتوطن بيه ويسوي وطن إله، (ولا يزول حكم الوطن عن هذا المكان إلا بزوال ملكه، ويسمى هذا الوطن بالوطن الشرعي).

قال: (والوطن بهذا المعنى) قد يتعدد في الخارج، (ويمكن أن يكون لشخص واحد أوطان متعددة شرعية)، بل يمكن أن يتعدد يا وطن؟ الاتخاذي. السيد الخوئي يقول وطن أصلي أكيد ما يتعدد، بس الوطن الاتخاذي يتعدد، والوطن الشرعي هم شنو؟ هم يتعدد. السيد السيستاني شيقول؟ وطن أصلي أكيد ما يتعدد، بس ياهو اللي يتعدد؟ الوطن الاتخاذي يتعدد، ما بيها شي، أنا أبقى ستة أشهر هنا للأبد، كل صيف أبقى هنا للأبد كل صيف أبقى، وهنا أبقى كل شتا مثلاً.

قال: (ويمكن أن يكون لشخص واحد أوطان متعددة شرعية، بل يمكن أن يتعدد) يا وطن؟ (الاتخاذي)، (وذلك كأن يتخذ إنسان على نحو الدوام) السيد الخوئي تقول دوام، هسة مو دوام، استمرار، استمرار يعني شنو؟ مدة طويلة فد عشر سنوات، فد 20 سنة ابقى هنا، والعشرين سنة الثانية ابقى هنا، مثلا هيج، (مساكن لنفسه يسكن أحدها مثلاً أربعة أشهر أيام الحر ويسكن ثانيها أربعة أشهر أيام البرد ويسكن الثالث باقي السنة).

القاطع الثاني: قصد الإقامة

(الثاني) القاطع الثاني من قواطع السفر (قصد الإقامة)، هو (قصد الإقامة في مكان معين عشرة أيام). يقول في مكان معين وهاي مهمة، في مكان معين، مو تقلي عشرة أيام أبقى أوزعها هنا وهنا وهنا، ما يصير، عشرة أيام تكون وين؟ في مكان واحد، هاي مهمة يعني.

يقول: (وبذلك) يعني بالقصد (ينقطع حكم السفر ويجب عليه الإتمام، ونعني بقصد الإقامة) شنو قصد الإقامة؟ (اطمئنان المسافر بإقامته في مكان معين عشرة أيام)، اطمئنانه، ما قلنا له قصد يعني أنت تريد تقيم، مو قد يكون واحد ما ناوي ما يريد يقيم، ما أريد أقيم آني، بس قوة عليه راح يخلوني أقيم، مثل إيش؟ مثل المسجون، مثل المكره، مجبور واحد جابره تعال لهاي المنطقة، هو ما يريدها ما يحبها أصلاً، هذا شنقله؟ نقله زين أنت هسة عوفنا من تريد لو ما تريد، أنت راح تبقى عشرة أيام؟ يقول إي بس مجبور آني، نقله يسمونه قاصد الإقامة.

فمو تسمعون قاصد الإقامة تتصورون يعني معناها هو يريدها ويحبها، إحنا ما نريد أنه نريد بقصد الإقامة أنه يطمئن على رأي السيد الخوئي، يطمئن أنه سيبقى فيها شقد؟ عشرة أيام، سواء كان هذا البقاء عشرة أيام باختياره أم بإجبار عليه، بس ما دام باقي عشرة أيام كالمسجون فهاذ شنو حكمه؟ يتم. (سواء كانت الإقامة اختيارية أم كانت اضطرارية أم إكراهية).

(فلو حبس المسافر في مكانه وعلم) المسافر (أنه يبقى في هذا المكان عشرة أيام) أكيد شنو حكمه؟ (وجب عليه الإتمام).

ثم قال: (ولو عزم على إقامة عشرة أيام ولكنه لم يطمئن بتحققه) في الخارج (بأن احتمل سفره قبل إتمام إقامته) ليش احتمل؟ (احتمل ذلك لأمر ما) فد أمر يصير واطلع آني يجوز أو أرجع لأهلي، حينئذ (وجب عليه التقصير وإن اتفق أنه) صدق (أقام عشرة أيام).