أحكام الجبائر

أعوذ بالله السميع العليم من الشيطان الغوي الرجيم، بسم الله الرحمن الرحيم، وصلى الله على محمد وعلى أهل بيته الطيبين الطاهرين.

(اللهم صل على محمد وآل محمد).

اللهم صل على محمد وآل محمد. أحكام الجبائر.

(الجبيرة هي ما يوضع على العضو من الألواح أو الخرق) خرقة جمع خرق، يعني الوصلة، (ونحوها إذا حدث فيه) يعني في هذا العضو (حدث كسر أو جرح أو قرح).

إذن الآن نتكلم عن أحكام الطهارة الاضطرارية، يعني حالة خاصة عند الإنسان، عنده جبيرة، الجبيرة يعني شنو؟ يقول السيد الجبيرة عبارة عن كل ما يوضع على العضو -يعني أعضاء الوضوء أو أعضاء الغسل، مثلاً اليد، اليد من أعضاء الوضوء- فهاي اليد من أعضاء الوضوء فرضاً هناك جبيرة عليها. شنو الجبيرة؟ يقول: كل ما يوضع على العضو من الألواح -إذا كانوا مخلين لوح قبل، لوح خشبي بسيط، أو الآن شيسمونه؟ (چبس) هالسيد، أو يخلون خرق يعني وصل- بالنتيجة كل ما يوضع على العضو من الألواح أو الخرق أو نحوها مثل هذا (التچبيس) وغيره، إذا حدث فيه كسر أو جرح أو قرح.

بس ذني الثلاثة مولانا، إذا صار كسر أو جرح أو قرح. إذا صار كسر أو جرح في الموضع فاضطريت شتسوي أنت؟ اضطريت تخلي لك جبيرة، خل نسميها ضمادة، هاي الضمادة شيسمونها بالفقهاء؟ يسمونها جبيرة، سميت جبيرة لأنها تجبر الموضع أي تصلحه، والجبر هو الإصلاح. إذا فهمتوا هاي فهناك تفاصيل كثيرة.

قاعدة إيصال الماء وموانع الجبيرة

إحنا اشترطنا في الغسل وفي الوضوء اشترطنا أن يصل الماء لمن؟ إلى البشرة، زين هاي الجبيرة مشكلتها راح شتسوي؟ تمنع الماء من الوصول للبشرة، فما هي الأحكام؟ شلون الواحد يتوضأ؟ شلون الواحد يغتسل؟ إذن السؤال مهم هذا ومسألة ابتدائية.

أول شيء أنبهكم عليه، إحنا نتكلم عن الكسر أو الجرح أو القرح -القرح يعني الجراحات تصير- ما نتكلم عن أسباب أخرى لوضع الجبيرة. إذا واحد مخلي جبيرة لأسباب أخرى مثل إيش؟ مثل الورم، الورم ما مشمول بأحكام الجبيرة. بعد شنو الأشياء الأخرى؟ بالنسبة للحرق، الحرق السيد الخوئي في استفتاءات يقول نعم مشمول بأحكام الجبيرة، يشمل بأحكام الجبيرة.

زين مرات شنو؟ مرات بعد شنو أكو أشياء تلتصق باليد تصير مثل الجبيرة يعني لاصقة ما يصير ما يمكن إزالتها، كما ذولا اللي يشتغلون بالأصباغ، بالصبغ، واللي يشتغلون.. أكو أعمال معينة، أكو بالعمل معين يقتضي إنه فد شي يلزق بيده ما يقدر يوخره، ما يقدر يشيله، فلو آ.. أنت تقلي ما يصير لازم توصل الماء إلى البشرة، هذا ما أقدر أشيله شسوي؟ واضح؟ فرجاء انتبهوا، الجبيرة السيد وضحها يقول ترى إلا يوضع على الكسر أو الجرح أو القرح، إذا فد شي لا هو كسر ولا هو جرح ولا هو قرح، هاي مو حكم جبيرة، جا شحكم إيش؟

حكم ما لا يُعد جبيرة (التيمم)

خل نعرف هسة شنو القاعدة، إحنا القاعدة إنه يجب إيصال الماء لمن؟ إلى البشرة، هاي القاعدة. فإذا لم يمكن إيصال الماء للبشرة، أو إذا لم يتمكن المكلف من الوضوء، فحكمه شنو؟ التيمم. القاعدة اللي عندنا في الآية المباركة (فلم تجدوا ماء فتيمموا)، إذن المفروض إنه واحد ما يقدر يتوضأ شيسوي لازم؟ يتيمم.

نعم، أهل البيت (سلام الله عليهم) ذكروا حالات استثنائية قالوا أكو شغلة لا هي.. لا هو وضوء طبيعي ولا هو حاجة تروح للتيمم، شيسمونها هاي؟ يسمونها وضوء الجبيرة. بس وضوء الجبيرة الأئمة خصصوها بيا حالة؟ بحالة كسر، جرح، قرح. غير هذني لازم شتسوي أنت؟ حكم التيمم. فإذن خل نعطي قاعدة: أي مورد ما مذكور بوضوء الجبيرة إحنا وين راح ندخله لازم؟ بالتيمم. هاي واضحة؟

لهذا يجيك واحد يكلك أنا هذا على إيدي صبغ، والله العظيم شكد حاولت أوخره ما وخر ما راح، شسوي أتوضأ وضوء جبيرة؟ شتجاوبه؟ تكله لا وضوء الجبيرة ما يفيدك أنت، أنت حكمك القاعدة الأولية شتكول: (فلم تجدوا ماء فتيمموا)، إذاً وظيفتك التيمم.

المفروض أي واحد ما يقدر يتوضأ شنكله؟ تيمم، إلا إذا انشمل بمن؟ بحكم الجبيرة، والمشمول بحكم الجبيرة ناس خاصين، أول شيء شنو؟ كون كسر أو جرح أو قرح، غيرها ما يصير. المتورمة إيده شنكله؟ يكول أنا إيدي مورمة هاي، نسميها مفصوخة إيده مو كسر هذا، يكول إيدي انفسخت، تكله كسر؟ يكول لا مو كسر مفصوخة إيدي، هذا لا هو جرح ولا قرح ولا كسر، يكلك شسوي آني؟ مو تكله وضوء جبيرة، تكله لا أنت تيمم، حكمك التيمم.

الجمع بين الوضوء والتيمم (الاحتياط)

بعد اكو هواي مصاديق، بعد خل أوضحلكم مسألة، هاي تفيدكم كلش في وضوء الجبيرة. أفضل شيء إذا أنت تشك إنه هذا القدامك وضوء جبيرة عليه لو تيمم، أحسن شي شتسوي؟ تجمع. لهذا أنت مرات تشتبه.. راح نحكيها وضوء الجبيرة، مرات تنسى أنت السالفة، تنسى المطلب. فاحتياطاً من عندي، شلون في بحث الحائض من قلنا الأفضل شي شتسوي؟ تجمع بين تروك الحائض وأعمال المستحاضة، هنا هذا هم نفس الشيء، أكو عندنا قاعدة أعطيكم إياها، بالجبيرة إذا أنت الحكم ما تذكره، ناسيه، تشتبه، شتكله؟ تكله سهلة، توضأ وضوء جبيرة ووراها شنو؟ وراها تيمم.

لهذا من هسة أكلكم، إذا أحكام الجبائر الراح تجي إذا تنساها أو واحد منكم يكول ما أريد أقراها، أي لا تقراها، أعطيك حكم يجاوب عن كل سؤال بالجبيرة، شنو؟ إذا سئلت عن وضوء الجبيرة هي مبين لو وضوءك وضوء جبيرة لو عليه شنو؟ تيمم، فأنت شتسوي من هسة؟ كله اجمع بيناتهن أحسن، اجمع بين وضوء الجبيرة وبين التيمم يخلصك من كل مشاكل وضوء الجبيرة القادمة. واضح؟

من هسة أخذنا قاعدة: القاعدة الأولى إنه الشخص الما يتوضأ لازم شيسوي؟ يتيمم إلا إذا استثني بمن؟ بالجبيرة. الحالة القاعدة الثانية اللي أخذناها إنه مقتضى الاحتياط -مو واجب احتياط- مقتضى الاحتياط إذا أنت ما تعرف أحكام الجبيرة شتكول للناس؟ اجمعوا، اجمعوا بين وضوء الجبيرة وبين التيمم، هذا مقتضى الاحتياط أفضل. أما إذا تعرف الحكم ومتأكد من عنده جاوبه، إذا متأكد من الحكم جاوبه كله لا عليك بس وضوء جبيرة، عليك بس تيمم، بس إذا شكيت وما تدري شتكله؟ تكله آني ما أدري أنا أتذكر عليك بس وضوء جبيرة بس أنت خاسر خسارة؟ توضأ وبعد شسوي وراها؟ تيمم. إلا إذا هو يكلك أنا ما أقدر، ما أقدر أتيمم أقدر بس أتوضأ، أو أقدر بس أتيمم، إذا يكلك بس وحدة أقدر ما أقدر الثانية شوية لازم تتأكد من حكمك، هو يحسب عليك الطريق.

نقاش مع الطلاب حول العازل والماء

[سؤال من أحد الطلاب حول وجود عازل في الكف وموضع الغسل]

أجاب الأستاذ: إي بس هو ما يقدر.. هم يشترط التيمم هم يشترط فيه أن لا يكون هناك عازل.. [مداخلة: أن يتيمم على الجبيرة].. ما سوينا شي شيخي هو ما يقدر، ما عندنا حل ثاني، فهو أول وتالي لازم يتيمم. [مداخلة: إذا هنا مثلاً موضع، لازم نوب يجمع، بين التيمم..]. إي هاي لازم، إحنا نحكي على الحالة الطبيعية هي مو لازم.

سؤال طالب: شيخي إذا كانوا ناعمين يعتبر جبيرة؟

أجاب الأستاذ: هاي أنت شتكول؟ هي جرح؟ هي مو جرح. هاي واحد مرات يخلوله مغذي، هذا يصدق عليه جرح؟ وما مجروح، هو عنده فد مرض آخر ما مرتبط بها بإيده، بس هم خلوله هاي الكانونة بإيده، فلا جرح لا قرح لا كسر. شنو القاعدة إحنا قلنا بذاك الحال؟ بذاك الحال أنت شنو.. أول شي، طبعا بالمناسبة أكو قاعدة قبلها، القاعدة هي هاي قبلها، إنه قبل لا نروح للتيمم وقبل.. إحنا نكله يمكنك أن تتوضأ؟ إذا قال يمكنني أن أتوضأ، شغلتك محلولة أنت.

فيجيك واحد مضمد إيده من ساسها لراسها، يكلك شنو حكمي؟ مو بسرعة تكله وضوء جبيرة، تسأله سؤال طبيعي، تكله لا تخوفني بهاي جبيرتك، تقدر تنزعها وتتوضأ؟ قالك إي. جا بعد إي بين، انحلت، توضأ وضوء طبيعي أنت، حتى إذا كان جبيرة كبيرة أو صغيرة. مولانا أخذوها قاعدة، اللي يسألكم عن وضوء الجبيرة مو نكول له اجمعوا أول شيء، لا أول شيء كله يمكنك نزعها؟ يكول يمكنني، يكول ها انحلت، لا تيمم لا دوخة راس، روح روح انزعها وتوضأ وضوء طبيعي ما يضرك، يكول ما يضرني. أو يجي واحد يكول أنا ما أقدر أنزع، نزع ما أقدر أنزعه، بس أقدر أدخل المي من داخله، أو أغمسها بالمي غمس، تكله يعني المي يوصل للبشرة؟ يكولك إي. شنكله هذا هم؟ هم روح توضأ.

فرجاءً وضوء الجبيرة أول تفصيل مهم وأول قاعدة مهمة، وحتى مقدمة على مسألة اللي ذكرناها مال التيمم، إنه اللي يتمكن من الوضوء حتى لو كان مجبر، ما يصير تكله تيمم ولا تكله اجمع ولا.. كله مباشرة شنو هذا؟ يتوضأ وضوءاً طبيعياً وعامله معاملة الإنسان اللي ما عنده جبيرة. إذاً وين مشكلتنا ويامن إحنا؟ مشكلتنا وي اللي ما يقدر ينزعها، أو ما يقدر يوصل المي جواها، هذا شيسوي؟ هذا مثل ما قلتلكم المفروض إحنا نحكمه تيمم لكن الروايات قالت لا، أكو إله أحكام خاصة. وهذا إذا تريد تحتاط شتكله؟ اجمع بين الوضوء وبين التيمم.

صور الجبيرة وحالاتها

(قال الجبيرة..) قرينا تعريفها، الآن قال (وفي ذلك صورتان) شنو ذلك؟ يعني من الألواح والخرق وغيرها، (أن يكون شيء من ذلك في مواضع الغسل) بالوضوء.

طبعاً بالمناسبة السيد راح يحكي هسة كله على الوضوء، ما يحكي على الغسل، خاف تتوهمون، حتى إذا.. يعني ما يحكي على أحكام التغسيل، أحكام التغسيل راح يذكرها بمسألة 134، أما كل هالحكي كله على الوضوء جاي يحكي، فخاف بعضكم يشتبه يكول هذا غسل، لا ما يحكي على الغسل، ما يحكي على الاغتسال، يعني ما يحكي على أحكام المجنب شلون شيسوي، أنا عندي جبيرة ومجنب شلون؟ يكول السيد هاي بعدين نحكيها يا مسألة؟ 134. فكل رجاءً كل المسائل القادمة، أو هاي المسائل الآتية من هاي المسألة إلى قبل 34، 134، كلها الحكي وين؟ على الوضوء. حتى من يعبر غسل يقصد بي يقصد غسل العضو، يعني غسل اليد مثلاً، مو غسل.

فهنا شوف شيكول: (أن يكون شيء من ذلك في مواضع الغسل) كالوجه واليدين. (ثانياً: أن يكون هذا الشيء في مواضع المسح) كالرأس والرجلين. شنو الحكم؟ يقول: (وعلى التقديرين) فإن لم يكن في غسل الموضع أو لم يكن في مسحه ضرر أو الحرج، شنو الحكم؟ (وجب غسل ما يجب غسله ومسح ما يجب مسحه). إذا ما يستلزم، كلشي ما يأثر عليه، لا يأذيني، لا يسبب لي ضرر -أذية يعني مرض- ولا يسبب لي فد حرج معين، إنه مثلاً الضرر ينظر فيه لمن؟ إلى النقصان والمرض، الضرر لغة هو النقصان، وينطبق هنا على المرض. الحرج ينظر فيه للمشقة، مشقة وشدة. فبالنتيجة كلشي ما يأذيك، لا يسوي لي شدة ومشقة، ولا يسوي لي فد مرض أو أذية، يكله شنو حكمك أنت؟ وخر هاي الجبيرة وتوضأ وضوء عادي. لهذا قال: وجب غسل ما يجب غسله ومسح ما يجب مسحه، لا يتوضأ وضوء جبيرة ولا يتيمم، يتوضأ وضوء شنسميه؟ وضوء اختياري، ماكو وضوء جبيرة هنا، يتوضأ وضوء اختياري يعني الوضوء الطبيعي هذا مالنا.

(أما إذا استلزم شيئاً من ذلك) شنو ذلك؟ يعني الضرر أو الحرج، ما هو الحكم؟ قال هنا ففيه صور. هاي الصور هي خلاصة.. يعني أربع صور إذا تحفظها كل أحكام الجبيرة تخلص عندك. لهذا هاي الصور الأربعة تحفظها، وهاي القاعدة اللي انطيتك إياها وهي الجمع بين الوضوء والتيمم، إذا تحفظ ذني الصور الأربعة وهاي القاعدة اللي انطيتك إياها، أي حكم من أحكام الجبيرة تجاوب عليه بكل سهولة.

نعم بعد عندك فد شغلة كون تحفظ مسألة 134 حتى ذيج بالغسل، وتحفظ ذيجة أم الغسل هم مهمة، وتحفظ ذني الصور الأربعة، والقاعدة اللي انطيتك إياها، أحكام الجبيرة تصير عندك كلش واضحة. بالمناسبة مولاي راح تشوفون تتفاجئون وي الناس، الناس هسة برة مجرد خلى له.. خلى له وصلة قبل يروح يتيمم، الناس عندهم فد حكي غريب ما أدري منين، مجرد يخلي له وصلة على إصبعه هذا، إصبعه إذا انجرح خلى له وصلة، يكول أنا هاي هي تيمم بعد. ما أدري منين ماخذيها، الناس ما عندهم وضوء جبيرة، يتفاجئون من تكلك وضوء جبيرة، الناس عندهم أقل.. أقل شيء قبل يروح يتيمم، يكولك هاي هي آني ما.. ما أتوضأ أتيمم. ما عندهم فد شيء وسط، فنبهوا الناس.

الصورة الأولى: الجرح مكشوف (بدون جبيرة)

يقول السيد: هاي الصور اللي قلنا مهمة الصور الأربعة، خلاصة الصور الأربعة: هاي الموضع اللي أنت.. مجروحة، إيدك مجروحة أو مكسورة غير؟ لو مخلي جبيرة لو ما مخلي؟ احتمالين، واحد ما مخلي، هي مكسورة إيده، بس مكسورة صعبة، مجروحة إيدي بس آني ما خليت جبيرة، ما مخلي، ما عندي أو آني ما يعجبني أخلي، شنو حكمي هنا؟ بس رجاءً لا تنسون فرض كلامنا يقدر يوضيها لو ما يقدر؟ يقدر يخلي مي؟ ما يقدر، إذا قدر يخلي مي هاي واضحة، لا فرض كلامنا يكول لا لا ما أقدر، بس أخلي قطرة مي آني أتأذى.

هاي جبيرة لو عليه جبيرة لو ما عليه، أعطيكم الحكم السهل؟ السهل هو اللي عليه جبيرة، والحمد لله هو هذا ابتلاءاتنا، أكثر الناس مبتلين بمن؟ يخلي جبيرة مو ما يخلي، السيد يكول أكو احتمال ما يخلي جبيرة، هذا الما يخلي جبيرة شوية بي تفصيل، مزعج، بس الواضح ياهو الواضح؟ اللي يخلي جبيرة والحمد لله هو هاي الناس هيج عدهم، فالحمد لله الحكم الواضح هو الحكم اللي عند الناس هم زين.

الناس هسة من يقلك إيدي مجروحة يخلي جبيرة لو ما يخلي؟ مخلي جبيرة وتسألك، السيد يكول جيد إذا جاك واحد مخلي جبيرة، مخلي جبيرة على إيده، فشغلته كلش سهلة. هاي الجبيرة وين في مواضع الغسل لو في مواضع المسح؟ بكيفك لو مسح لو غسل، إذا بمواضع المسح تعامل وياها على أنها غير موجودة. مثل إيش مواضع المسح؟ رجلين، الرأس أو الرجلين، نأخذ الرجلين مثال. فلو فرضنا واحد برجله أكو جبيرة، أنت لو فرضنا ماكو جبيرة شسوي؟ أمسح على كل رجلي، إذا أكو جبيرة؟ هم أمسح عليه حاله حال كأنها غير موجودة، فوقها بالضبط تمسح فوقها يعني. هاي رجلي وهاي جبيرة، هي لو فرضنا ماكو جبيرة شسوي آني؟ أمسح هيج، إذا أكو جبيرة؟ هم أمسح، فوقها عادي. لهذا كلش سهلة ما يتيه هذا الحكم، الجبيرة إذا كانت في مواضع المسح امسح عليها كأنها شنو؟ غير موجودة، امسح على نفس الجبيرة مثل ما تمسح على غيرها، هاي وين إذا كانت في مواضع المسح.

الصورة الثانية: الجبيرة في مواضع الغسل

إذا في مواضع الغسل، على إيدي هاي المرة، على إيدك شتسوي؟ تغسل ما حولها، ومن توصل إلها شتسوي؟ تمسح عليها، وبعدين والباقي؟ تغسله. واضح شلون؟ بس هاي المرة مو تغسلها، شتسويلها؟ تمسحها، لأن هاي المرة موضع غسل، لكن أنت خوما تغسلها؟ إذا تغسلها معناها تمكن من إدخال.. [توضيح حركي من الأستاذ]: يعني هاي الجبيرة تلاحظون؟ شسوي آني؟ هاي الجبيرة هي فرضاً، آني أول شيء أغسل هذا الموضع، اللي قبلها أغسله غسل عادي، أوصل وين؟ وصلت للجبيرة شسوي؟ أمسح عليها، أستوعبها بالمسح، داير ما دايرها بالضبط، وهاي المنطقة اللي وراها؟ أغسلها كأنها ما بيها شي بعد المنطقة. [سؤال طالب: إذا هذا الثاني غسل جديد أجيب لها مي جديد؟]. هو حتى إذا مي جديد شنو المشكلة؟ مشكلة واحد يجيب مي جديد لغسل يده؟ ماكو مشكلة هاي إحنا ماخذينها بعرفياتنا ما يصير مي جديد، هي اليد مطلوب منك أن تغسلها غسلة واحدة حتى إذا بعشر صبات. [مداخلة: حتى إذا غسلت هيج والنوب رجعت مرة ثانية]. إي شنو المانع؟ غسل بالمسح ما يصير تجيب مي جديد.

إذن هاي حفظوها، الحكايتين حفظوها: الجبيرة إذا في مواضع المسح امسح عليها كأنها غير موجودة، نفس الكلام إذا كانت في الرأس يمسح عليها عادة. القاعدة العامة عرفناها شنو؟ القاعدة العامة إنه الجبيرة إذا كانت في مواضع المسح امسح عليها وكأنها شنو؟ غير موجودة، واضحة لو صعبة هاي؟ إذن الحمد لله هذا حكم كلش سهل هذا الحكم.

فأنا عندي جبيرة برجلي، أتوضأ وجهي أوضيه وضوء عادي، إيدي أوضيها وضوء عادي، وأمسح وأوصل إلها، عادي كأنها غير موجودة، أمسح عليها مثل ما أمسح على غيرها. أما في مواضع الغسل إذا كان واحد مخلي لاصق هنا، هم جبيرة هاي اللاصق، مجروح هنا وخلا له لاصق، شنو حكمه؟ نكله اغسل ما حولها، توصل عليها امسحها مسح، وكمل باقي وجهك.

بس تراعى الترتيب، تراعى الترتيب مو أول ما تمسحها بعدين تغسل اللي قبلها واللي بعدها، لا اغسل اللي قبلها، توصل يمها امسحها، وبس يراعي الترتيب. بعد عندنا يا صورتين شوية مزعجات؟ والحمد لله الناس ما عدهم ذني الصورتين، أكو صورتين مزعجات بس الحمد لله الناس ما عدهم، يا صورة؟ صورة إيدي مجروحة بس ماكو جبيرة، هاي شلون؟ هي مو صعبة، لا بيها تفصيل، بس الكسر إله حكم، والجرح والقرح إله حكم، شوية هذا قصدي صعب، مو صعب بس نقراه تشوفونه سهل، بس شوية واحد ينساها مرات، يكله إذا مكسورة كنت تتيمم، إذا ما مكسورة جرح خلي عليها جبيرة وامسح، وإذا تريد ما تخلي جبيرة امسح ما حولها، هسة راح نقراها.

هاي ابتلاء لو مو ابتلاء؟ قليل الابتلاء، أكثر الناس ابتلاءً بمن؟ بالجبائر الموجودة، مو فد جرح ماكو جبيرة، هسة من راح نقرا الصور الأربعة تشوفون المطلب شكد سهل، ماكو جبيرة شنو حكمه؟ سيأتي راح السيد يوضحه بعد شوية.

قراءة المتن وتطبيق الصور

لهذا قال: (الأولى: أن يكون الكسر أو الجرح أو القرح في أحد مواضع الغسل ولم تكن..) شوف اختار أول شيء اختار يا حكم؟ اختار الحكم الصعب اللي إحنا قلنا.. (ولم تكن في الموضع جبيرة) ففي هذه الصورة يجب غسل ما حول الجرح أو القرح، شوف الجرح والقرح فصلهن على صفحة، والكسر بعدين يحكي عليه، والأولى مع ذلك أن يضع خرقة على الموضع ويمسح عليها، وأن يمسح على نفس الموضع أيضاً إذا تمكن من ذلك، وأما الكسر فالمتعين فيه التيمم.

شنو هاي الفكرة؟ يقول إذا واحد جاك قالك آني عندي جرح أو قرح أو كسر، شنو حكمي؟ وماكو جبيرة. شتسأله؟ تكدر تخلي مي؟ قال ما أقدر أخلي مي، إحنا قلنا يقدر يخلي مي يتوضأ وضوء عادي. ما أقدر أخلي مي، شنو حكمه؟ يقول السيد وين تباوع هسة؟ الساعة هي مجروحة إيدي بمكان الساعة، ما أدري ليش الساعة خلى وصلة، بس هاي أكو جبيرة لو ماكو جبيرة؟ فرض الكلام ماكو، هي إيدي مجروحة، فشسوي؟ أغسل ما حوله، من أوصل يمه شسوي؟ أمسح لو ما أمسح؟ لا ما أمسح، ما أمسح هاي المرة، لأن إذا مسحتها أأذيه، واضح؟ أغسل اللي أقدر أغسله وهي نفس موضع الجرح إيدي بمكان المجروح ما أجيسه. يستحب من باب الاحتياط شسوي؟ خلي عليه وصلة صغيرة وامسح ع الوصلة، وباقي إيدي؟ أكمل غسلها عادي. هذا نحكي عالجرح والقرح، أما الكسر؟ إيدي مكسورة هنا شنو حكمي؟ تيمم، يقول لا تيمم هذا.

هذا الحكم التفريق بين الكسر والجرح رجاءً لا تشتبهون، وين هذا بيا موضع؟ فيما لو لم توجد جبيرة، أما إذا أكو جبيرة أكو فرق؟ لا ماكو فرق، الحمد لله الناس وين تسألنا بيا حالة؟ بحالة الجبيرة، فالشغلة سهلة لو صعبة بعد سؤال الناس؟ سؤال الناس سهل، لهذا لا تكله كسر وجرح، كله روح سهلة هاي شغلتك، اغسل ما حوله وامسح عليها. الصورة الثانية (أن يكون الكسر أو الجرح أو القرح يكون في أحد مواضع الغسل..) هذه المرة (..وكان عليه جبيرة) هاي شغلتها كلش سهلة، ففي هذه الصورة يغسل ما حوله ويمسح على الجبيرة مثل ما قلنا.

الثالثة (أن يكون شيء من ذلك..) يعني من الكسر أو الجرح أو القرح (..وين؟ في أحد هذه المرة مواضع المسح وكانت عليه جبيرة)، هذا شنو حكمه؟ (يجزي المسح على الجبيرة) مثل ما قلتلكم كأنها غير موجودة، هو آني رجلي أول وتالي أمسح على هذا المقدار، هذا المقدار اللي بي جبيرة أول وتالي أمسح عليه، فإذا أكو جبيرة؟ أتعامل وياها على أنها غير موجودة فأمسح عليها عادي، صعبة هاي لو سهلة؟ سهلة، بالرجلين أعدها مال الرجلين؟ أما في مواضع الغسل إذا كان واحد مخلي لاصق هنا، هم جبيرة هاي اللاصق، مجروح هنا وخلا له لاصق، شنو حكمه؟ نكله اغسل ما حولها توصل عليها امسحها مسح كمل باقي وجهك، بس راعي الترتيب، راعي الترتيب مو أول ما تمسحها بعدين تغسل اللي قبلها واللي بعدها، لا اغسل اللي قبلها توصل يمها امسحها وبس يراعي الترتيب.

الصورة الرابعة (أن يكون شيء من ذلك في أحد مواضع المسح لكن..) شنو هاي المرة؟ (..لم تكن عليه جبيرة) فالأحوط في هذه الصورة أن يضع خرقة عليه ويمسح عليها ثم يتيمم. شوف هذا حكم غريب هم إجه، هذا ما قايلكم عليه آني، آني قلتلكم قبل شوية إذا كسر شنسوي؟ يتيمم، وإذا ماكو كسر قلنا يغسل ما حوله ويمسح. هنا السيد شو طفر؟ طبعاً ما يقدر، ما يقدر يتوضأ، بس هاي المرة وين الكسر أو الجرح أو القرح؟ في مواضع المسح. يقول ما أقدر أخلي مي عليها، شسوي؟ نقول له عليها جبيرة لو لا؟ إذا قال عليها جبيرة أسهل منها ماكو، إذا قال عليها جبيرة كله امسح ماكو مشكلة هاي رجلك امسح عادي، أما إذا يقول ماكو جبيرة، إذا ماكو جبيرة مثل ما قلتلكم هي هنا إذا ماكو جبيرة شيصير الحكم غريب ينسي، إذا ماكو جبيرة السيد شيكله؟ يكله عبارته: فالأحوط في هذه الصورة أن يضع خرقة عليه ويمسح عليها وبعدين هم شيسوي؟ فيجمع بين وضوء وضع خرقة ويتيمم.

السيد الخوئي، السيد السيستاني يقول يكفي التيمم، ما يحتاج يضع خرقة وبعدين، بس يتيمم مباشرة. فراح نلخصها إذن، تلخيص الصور الأربعة، تساعدوني خاف آني أنسى. إذا واحد عليه جبيرة نشوف هاي الجبيرة قبل لا نسأله هي وين، قبل لا نسأله نقول له يمكنك تتوضأ؟ شجاوب؟ إذا قال يمكن نقول له ها هي، حكمك حكم أي إنسان ما عنده جبيرة، وضوء عادي توضأ وضوء عادي. إذا قال ما أقدر، لا ما أقدر أخلي مي، ما تقدر تخلي مي، أكو جبيرة لو ماكو؟ قال أكو جبيرة، نقول له رحم الله والديك هذا حكم سهل حظي له هذا، وين جبيرتك؟ قال جبيرتي على الجبهة، عالقصة، قله سهلة هاي، اغسل ما حول الجبيرة والجبيرة شسويلها؟ امسح عليها، فيغسل هذا مقدار ويمسح على هذه ويكمل باقي وجه عادي.

إذا في اليد؟ نفس الشيء يغسل ما حول الجبيرة ويمسح على الجبيرة ويغسل الباقي، هاي إذا كانت في مواضع الغسل. أما إذا كانت في مواضع المسح؟ يمسح عليها وكأنها غير موجودة، شلون هاي الجبيرة يمسح عليها عادي، مسحة وحدة، هاي إذا كان أكو جبيرة. أما إذا ماكو جبيرة، فنسأله وين جرحك أو قرحك؟ إن كان في مواضع الغسل أو في مواضع المسح، إذا في مواضع الغسل فنقله كسر لو جرح؟ شوف شلون صار اختلاف، بتنسي، تنسي هاي الشغلة بس كون تحفظها أنت، كسر لو جرح؟ إذا قال جرح، قله شغلتك سهلة، في مواضع الغسل ها؟ يغسل ما حول الجرح ويوصل للجرح شيسوي؟ يعوفه، وإذا الأفضل أن يخلي عليه وصلة ويمسح ع الوصلة ويكمل باقي الوضوء. هاي إذا كان جرح أو قرح، أما إذا كان كسر؟ قله لا لا أنت مو وضوء جبيرة، قبل شسوي؟ روح تتيمم، هاي إذا كان شنو؟ إذا كان ماكو جبيرة وفي مواضع الغسل. أما إذا في مواضع المسح وماكو جبيرة؟ شنو حكمه هذا؟ السيد الخوئي يقول خلي وصلة وامسح ع الوصلة وبعدين هم تيمم، السيد السيستاني يقول لا قبل تيمم ما يحتاج.

شروط الجبيرة

قال (يعتبر) يشترط، هاي أمور مهمة الباقية هسة، بس إحنا لحد هسة عرفنا أغلب الأحكام. قال (يشترط في الجبيرة أمران) يا جبيرة يقصد؟ الجبيرة التي نحكم فيها بوضوء الجبيرة هجي قصده، السيد ما جاي يقول أنا الجبيرة اللي تخليها على الجرح لازم هجي، هاي مو شغلة السيد هاي شغلة الأطباء غير؟ بس السيد شيقصد يشترط في الجبيرة؟ قله سيدنا يشترط في الجبيرة هاي مو يمك، خل نشوف المضمدين هم يعرفون هاي السوالف، يقول لا أنا مو قصدي في يشترط في الجبيرة حتى تعالج بها جرحك، شعلي بهاي السوالف؟ أنا قصدي يشترط في الجبيرة التي تتوضأ معها وضوء الجبيرة، يعني الشروط الجاية إذا ما متحققة شيصير؟ وضوء جبيرة غير صحيح، فلازم شتسوي؟ تضطر تتيمم.

الشرط الأول: طهارة ظاهر الجبيرة

قال (أولاً: طهارة ظاهرها) فإذا نجسة بالظاهر؟ نكلك تكدر تطهرها؟ يكول ما أقدر، إذا ما يقدر كبل شيسوي؟ يتيمم. إحنا الجبيرة هي أول وتالي بيها نجاسة، مو صحيح؟ إذا جرح أول وتالي بيها نجاسة، بس النجاسة مرة نجاسة باطن ومرة نجاسة ظاهر، غالباً هم يخلون القطنة على الجرح وفوق القطنة شيسوون؟ هاي الضمادة، إحنا نكل للسيد سيدنا شنو تكول طهارة الجبيرة؟ هي الجبيرة أكيد نجسة، يكول لا لا آني كلت طهارة ظاهرها، مو طهارتها، هي أكيد نجسة من جوة، إحنا المهم عندنا يا طهارة؟ طهارة الباطن لو الظاهر؟ الباطن مية بالمية نجس إذا جرح، لا إحنا نحكي الطبقة الفوق، الطبقة اللي فوق قاعد نشوفها إحنا، أما الطبقة اللي جوة هاي مو مشكلة حتى إذا نجسة، لهذا كون تنبه المضمد إذا تروحله حتى أنت تتوضأ وضوء جبيرة براحتك، قله حاول حاول تخلي المنطقة الفوق تبقى على طهارتها، قالك إي آني ما راح.. خاصة إذا جرحك قليل ما يعبر دم أو كذا، فشيسوي هو؟ فد طريقة بحيث ما يخلي الدم يصعد وين؟ بالطبقة العليا من طبقات الجبيرة، إما بلي يكثر الجبيرة شوية بس مو مقدار مخل بالعرف، فشسوي؟ الجبيرة مو يجيبلك، مو يجيبلك وصلة نجسة، يقلك هو نجاسة نجاسة، قله لا لا راح تسويلي مشكلة، لا تجيبلي وصلة نجسة كلها، يقلك هو شنو الفرق هي كلها نجاسة وكله دم؟ قله لا لا عندي بيها غاية، شنو غايتي؟ حتى أتوضأ وضوء جبيرة، فرجاءً جيبلي فد هذا ضماد طاهر، يقلك يتنجس؟ قله إي يتنجس من هو؟ الباطن، ونحن نجاسة الباطن ما عندنا مشكلة، إحنا مشكلتنا هسة وين؟ بنجاسة الظاهر. السيد شيكول يشترط طهارتها كلها لو بس طهارة الظاهر؟ فقال طهارة ظاهرها.

(فإذا كانت الجبيرة نجسة وزائدة على مقدار الجرح) حتى وإن لم تزد على المتعارف (ولم يكن يمكن تبديلها ما هو الحكم؟ يقول سقط وجوب الوضوء ووجب التيمم). انتبهوا معي، فإذن الحكم هكذا الحكم إنه إذا كانت نجسة شتسوي لازم أنت؟ لازم تطهرها. زين مرات شنو؟ يقول إحنا وزائدة على مقدار الجرح، طبعا هي أكيد تزيد على مقدار الجرح، لأن هم اللي يلفله جبيرة خوما يخليها حد بحد؟ إذا كان الجرح بمقدار نصف هذا الإصبع، فالجبيرة تصير معقولة بمقدار نصف الإصبع؟ إذا جبيرة، إذا جرح على إيدي مسافته نصف إصبعي هذا هالمقدار هذا، فالجبيرة اللي راح تصير هم نصف الإصبع لو شوية تصير أكثر؟ أكيد هم حتى يستوعبون حتى ما يطلع الدم فيسويها شوية أعرض، يقول السيد هاي الأعرض الجبيرة العريضة ماشي، إذا كان متعارفة ما عندنا شيء، شنو معنى متعارفة؟ هم عادة شكد ما يصير جرح هم شيسوون؟ يخلون جبيرة شوية أوسع، هذا هم مشكلة لازم أوصل المي جوة هذا المقدار؟ اللي سترته الجبيرة واللي هو مو جرح؟ ما تفتهموني مو؟ هاي مسألة ابتلائية هاي مسألة مهمة.

هو الجرح بمقدار مثل ما قلنا هذا بمقدار هذا المقدار، بينما هو مخلله الجبيرة هالكبر كبر كفي، فصار مقدار الجرح صار هو شكد؟ قلنا هذا المقدار، اكو كسر في منطقة وهم يجبرون كل إيده. فالسيد شيكول؟ يكول ما أدري شوف العرف، العرف عدهم هاي جبيرة عادية لو يستغربون؟ إذا قال جبيرة عادية ها، فاللي واحد إذا مجروح بإصبعه عادة شيسوون هم؟ يجبرون أصابعه كلها، ما أدري، إذا مجروح بنصف بمنتصف كفه شيسوون هم؟ يجبرون كل الكف، إذا مجروح بنص ذراعه يجبرون كل الذراع، إذا براسه يجبرون كل هالمنطقة، هذا متعارف لو ما متعارف؟ متعارف. اسمع الما متعارف، الما متعارف شنو؟ مجروح بإصبعه مجبرين حد الكتف! هاي شنو؟ فإذن سؤال مهم، إحنا شريد؟ نريد الجبيرة ما تزيد على الجرح لو ما تزيد على المتعارف؟ متعارف. أعيدها، إحنا نريد من الجبيرة أن لا تكون زائدة على المتعارف، أما إذا كان زائدة على الجرح أكو مشكلة عندنا لو ماكو مشكلة؟ ماكو مشكلة امسح عليها حكمها نمسح عليها، هذا واضح سؤالكم؟ حتى إذا كان زائدة على الجرح يقول الفقهاء ماكو مشكلة امسح ع الجبيرة ماكو، مو شرط توخرها وتريد توصل المي لكل المناطق، لكن بشرط أن لا تكون زائدة على المتعارف.

متعارف من يحدده؟ يحدده العرف العام، والشيخ يكول إلا إله طبيب مو مضمد، لا مضمد طبيب ما أدري منو أنا ما أعرف، أنا أفتهم من العرف، العرف يكول طبيعي، اللي مجروحة بوسط، واحد من أصابعه الأربعة.. مو أصابعه، مجروح بكفه بالنص في منتصف كفه، عادة شيسوون هم؟ يجبرون الكف كلها ويجوز حتى الأصابع يدخلوها ما أدري، إذا كان متعارف. وهذا متعارف.

يقول السيد: (فإذا كانت الجبيرة) أول شيء نجسة -يعني بظاهرها- وبعد (وزائدة على مقدار الجرح) حتى وإن لم تزد على المتعارف (ولم يكن يمكن تبديلها ما هو الحكم؟ يقول سقط وجوب الوضوء ووجب التيمم). هذا -يعني الذهاب إلى التيمم- شوكت؟ (فيما إذا كان وجوب المسح على الجبيرة -لو فرضنا هي طاهرة- هذا الوجوب معلوم) وأما فيما إذا كان المسح على الجبيرة من باب الاحتياط ولم يتمكن المكلف من المسح على الجبيرة الطاهرة فالأحوط حينئذ الجمع بين الوضوء من دون أن يمسح على جبيرة وبين التيمم.

يقول هذا فد شيء مو فد مطلب مهم، إحنا قبل شوية شقلنا؟ قبل شوية قلنا إذا ماكو جبيرة على إيدك، ماكو جبيرة وإيدك من مواضع الغسل شتسوي؟ وين رحت؟ ما وياي يا الله. أعيد السؤال؟ واحد ماكو جبيرة على إيده، جبيرة ماكو على إيدك، شوية ركزوا وياي، ماكو جبيرة على إيدك، شوية ركزوا وياي ماكو جبيرة وإيدك من مواضع الغسل شتسوي؟ جرح جرح. اغسل داير ما دايره، والمستحب تخل خرقة وتمسح عليها. فإذن المسح على الخرقة في هذا الموضع احتياطي لو واجب مستقل؟ احتياط. فإذا كانت الجبيرة اللي جاي تخليها أنت نجسة، ما لقيت غير جبيرة نجسة، يقول السيد بهيج حالة ما نقلك ما نقلك انت روح تيمم، شنقلك؟ وخر الجبيرة ووخرها. واضح؟ لأن هاي المرة وجوب المسح على الجبيرة هو احتياطي لو واجب؟ احتياط هذا في هذا الموضع، فاحتياطي، هذا إذا كان الاحتياط احتياط واجب، وين يبين هذا؟ يبين (ان يكون شيء من ذلك في احد مواضع المسح) الصورة الرابعة خل نقراها بالله: (ان يكون شيء من ذلك في احد مواضع المسح ولم تكن عليه جبيرة) فالاحوط في هذه الصورة ان يضع خرقة عليه ويمسح عليها ثم يتيمم. التيمم واجب عليه، وقبل التيمم شسوي لازم؟ يضع خرقة، زين دورت لي خرقة جابولي خرقة نجسة، مشكلة، ماكو غيرها يكول بس هي هاي عدنا، يقول السيد هنا شلون؟ هم يضع خرقة نجسة ويمسح عليها وبعدين يتيمم؟ لو أصلا يترك وضع الخرقة؟ يقول السيد احنا قبل شوي من قلنا لكم هذا اللي جبيرته نجسة يذهب الى التيمم يسقط عنه وجوب الوضوء شوكت؟ اذا هو اصلا وجوب المسح على الجبيرة واجبا، اما هو هذا صاحبنا في مثال اللي ايده مجروحة هو اصلا يجب عليه المسح على الجبيرة بنحو الوجوب لو احتياط ادنا؟ احتياط، يقول اما اذا كان الحكم احتياطي فاي واحد حكمه احتياطي شنقله؟ نقله ماكو داعي يضع جبيرة نجسة، شسوي؟ ماكو داعي يجمع بين.. ماكو داعي يروح مباشرة للتيمم، بينما في الحالة العادية اللي جبيرته نجسة قبل وين يروح؟ للتيمم، اما هذا اللي هو حكمه احتياطي اي واحد حكمه احتياطي شنقله؟ نقله ماكو داعي يضع جبيرة نجسة، شسوي؟ ماكو داعي يروح مباشرة للتيمم، بس تتيمم وتتوضأ بس تتوضأ بيا طريقة؟ مو تمسح على الجبيرة النجسة، لا توخر الجبيرة النجسة تمسح شنو؟ حول الجرح، لهذا شيكول؟ يقول (هذا فيما إذا كان وجوب المسح على الجبيرة حتى لو كانت طاهرة هو وجوب معلوم -يعني وجوب يقيني مو احتياطي- وجوب فتوى مو احتياطي، اما فيما اذا كان المسح على الجبيرة من باب الاحتياط) هاي يا صورة؟ الصورة الرابعة يعني قبل شوية أخذناها (ولم يتمكن المكلف ان يأتي بجبيرة طاهرة) فما هو الحكم؟ (فالاحوط حينئذ الجمع بين الوضوء) لكن يمسح على الجبيرة النجسة لو ما يمسح؟ (من دون ان يمسح على الجبيرة وبين ماذا؟ وبين ان يتيمم). يعني هذا قول السيد “واما فيما اذا كان المسح عليها” يحكي على يا صورة؟ على الصورة الرابعة في تلك الصورة الرابعة اذا عندك جرح برجلك وهذا الجرح ما مجبر فاحنا قبل شوي شقلنا لك؟ ضع عليها جبيرة وامسح عالجبيرة وبعدين شسوي؟ بعدين تيمم. زين طلعت الجبيرة نجسة شنسوي؟ يقول بهيج حالة شتسوي؟ تمسح على الموضع من دون ان تضع جبيرة وبعد ذلك شتسوي؟ تتيمم.

الشرط الثاني: إباحة الجبيرة

(ثانيا) من شرائط الجبيرة (اباحة الجبيرة) فلا يجوز المسح على الجبيرة اذا لم تكن مباحة، عكس الاباحة شيسمونه؟ عكس الاباحة هو الغصب. فيجب تبديلها اذا امكن، أولا ع الأقل بقيها لكن شترضي؟ تسترضي مالكها، تخليه يبريك الذمة تقله يابا اشتريها منك ابرينا الذمة اذا قال ماكو مشكلة. (وان لم يتمكن منهما) ياهما منهما؟ لا يقدر يبدلها ولا يقدر يسترضي، يعني باقية مغصوبة، (سقط وجوب الوضوء) او سقط وجوب المسح على الجبيرة على التفصيل المتقدم، ما يجب عليك ان.. روح تيمم مباشرة ولا يجب عليك ان تمسح على الجبيرة لان هاي مغصوبة.

(يعتبر) في جواز المسح على الجبيرة (يعتبر اولا ان يكون في العضو اما كسر او جرح او قرح) اما اذا كان ورم او كان حاجب يعني صبغ شنو حكمه؟ تيمم، قال (فاذا لم يتمكن من غسله او مسحه لامر آخر) مو لامر انه كسر، يعني لامر آخر مثل ايش؟ (كالورم)، امر آخر مثل ايش؟ مثل لاصق التصق بيده هذا شسوي لازم؟ قال اذا لم يتمكن من غسل العضو مو لاجل ذلك بل لامر آخر كما لو كان نجسا مع تعذر ازالة النجاسة، اكو نجاسة على ايدي وهاي النجاسة شكد حاولت اوخرها ما قدرت، فهنا خوما اقدر اغسل لان اذا غسلت راح.. شنو حكمي هنا وضوء جبيرة لو يتيمم؟ يتيمم، قال (او لزوم الضرر من استعمال الماء) هذا سؤالي (او لصوق شيء بالعضو ولم يتمكن من ازالته) بغير حرج الا بحرج الا ينشلع قلبه يلا يقدر يزيله، هاي شلون؟ اكو لاصق على ايدي هذا الا توقعني بالضرر يلا توخره، اشيل الجلد، اشلع قلبه، لكن لازق على ايدي شسوي اني اتوضأ وضوء جبيرة لو تيمم؟ شنو الجواب؟ تيمم. يقول السيد الخوئي (ففي جميع ذلك لا يجري حكم الجبيرة بل يجب التيمم).

نعم اذا كان اللاصق بالعضو دواءً، بس الدواء يستثنى، لان الدواء حاله حال شنو؟ حال الجبيرة، دواء يعني هو دواء بس هذا الدواء يكون فد شنو؟ فد طبقة لاصقة فوق الجلد، يقول اذا يصدق عليه دواء احنا شعرفنا الجبيرة؟ عرفناها بان كل ما يوضع على العضو لاجل اصلاحه لاجل جبره، لهذا قال يجري عليه حكم الجبيرة. (واذا كان اللاصق غيره) يعني غير الدواء (وكان في مواضع التيمم) فالاحوط الجمع بينه -ياهو بينه؟ بين التيمم- وبين الوضوء. يقول اذا كان الحاجب هاي المرة في مواضع التيمم، هي شنو مواضع التيمم؟ الكفين والجبهة والجبينين بس ذني، اذا كان الحاجب في مواضع التيمم فانت من جهة ما تكدر تتوضأ لان حاجب، ومن جهة حتى التيمم ما تتيمم، فشسوي؟ نقلك شسوي؟ اجمع بيناتهن افضل.

(الثالث) الشرط الثالث (ان يكون الجرح او نحوه) او نحوه من الجبيرة يعني (في نفس مواضع الوضوء) هاي مهمة بعضكم سأل هيج سؤال، (فلو كان) يعني الجرح (في غير مواضع الوضوء لكن كان مما يضر به الوضوء) انا ما مجروح، وين هي اعضاء الوضوء؟ نكله اعضاء الوضوء الوجه واليدين، اليدين منين تبدي؟ اعضاء الوضوء اليدين منين؟ من المرفق الى الاصابع، يقول انا ايدي بيها جرح، نكله وين؟ يقول بالكتف. الجرح هاي المرة وين موجود؟ في منطقة فوق المرفق، منطقة فوق المرفق الجرح، لكن اذا وضع الماء على المرفق يتأذى، الجرح هنا قريب ع المرفق وقريب ع المرفق يعني خارج المرفق، لكن هو يقول اذا اخلي مي ع المرفق اتأذى، هذا شنو حكمه؟ يقول السيد (فلو كان في غيرها وكان مما يضر به الوضوء تعين عليه التيمم). اما اذا كان ما يضر الوضوء شنو حكمه؟ يتوضأ وضوء عادي بعد ما عندنا شي. (وكذلك الحال فيما اذا كان الجرح او نحوه في جزء من اعضاء الوضوء وكان مما يضر به غسل جزء آخر اتفاقا دون ان يكون مما يستلزمه عادة كما اذا كان الجرح في اصبعه واتفق انه يتضرر بغسل الذراع) مو بغسل الاصبع (فانه يتعين التيمم في مثل ذلك).

حالة اخرى مشابهة، الجرح هذا الجرح ما يأذيني، جرح بايدي اقدر اغسل باصبعي، الجرح باصبعي اقدر اغسله، شنو حكم قلنا له؟ تتوضأ وضوء عادي. يقول لكن اني اقدر اغسل اصبعي بس ذراعي ما اقدر اغسلها، نكله والله عجيب هاي! يقول هو الجرح باصبعي واصبعي ما يضره المي لكن فد سبحان الله فد وضع معين يسبب لي فد الم بحيث اذا خليت المي على المرفق، اخلي المي على المرفقي اتأذى، يقول هاي حالة غريبة احنا اللي نعرفه اذا الجرح تكدر توصل له مي تتوضأ، ما تكدر توصل له مي شنو؟ تتوضأ وضوء جبيرة، اما هاي حالتك عجيبة، فاحنا المشكلة في غسل الاصبع لو في غسل المرفق هنا؟ في غسل المرفق، المرفق هو بي جرح؟ بي قرح؟ بي كسر؟ فالقاعدة شنو حكمه؟ يتيمم. هذا والحمد لله رب العالمين وصلى الله على محمد واهل بيته الطيبين الطاهرين.